Monforte de Lemos, 6 de marzo de 2020. Dentro das actividades organizadas polo Equipo de Goberno do Concello de Monforte co gallo da celebración do Día Internacional da Muller, o 8 de marzo, na tarde de hoxe tivo lugar a inauguración dunha importante mostra pictórica na Casa da Cultura Poeta Lois Pereiro.
Trátase da exposición “Disconformes” da pintora ourensá Ana Ferreiro, que permanecerá aberta para todos os públicos ata o vindeiro venres 20 de marzo. A mostra está composta por 18 retratos de mulleres que deixaron a súa pegada na historia: escritoras como Rosalía de Castro, pintoras como Frida Kalho o políticas como Eva Perón.
No acto inaugural, ademais da propia pintora, estiveron presentes 1ª Tenente de Alcalde, Gloria Prada, as Concelleiras de Muller e Igualdade, Margarita López, que foi a encargada de abrir o acto; de Cultura, Marina Doutón, de Consumo, Regina López, e o Concelleiro de Servizos, José Luis Losada. Ademais deles, medio centear de persoas arropou á artistá ourensá na súa estrea en Monforte.
Ana Ferreiro naceu en Ribadavia e reside en Ourense dende 1994. Formouse en pintura ó óleo na Escola de Artes e Oficios de Ourense. Entre as súas últimas exposicións realizadas están a do Museo Municipal de Ourense (2012), a Casa de Galicia en Madrid (2013), a Colectiva Centro de Estudios Chamoso Lamas - O Carballiño (2018), a do Museo Municipal de Ourense (2019), a Colectiva Galería Visol - Ourense (2019) e a Colectiva Centro de Estudios Chamoso Lamas - O Carballiño (2020).
En palabras de Eva Torres (Técnica Áreas Expositivas dos Espazos Museísticos Municipais de Ourense) sobre Ana Ferreiro: “Muller, pintora, creadora e profesional que entrega o seu lenzo e pinceis cun grande respecto e compromiso, xerando unha grande cantidade de resultados visuais. A perfección das formas figurativas, o exacto emprego de pigmentos cromáticos que delimitan o artístico do conceptual converten as imaxes reais en obras de grande solidez imaxinativa, facendo da obra de Ana un proxecto serio de grande peso creativo e decididamente artístico”.
“Impregnada de sensibilidade, a súa coidada técnica pictórica plasma a materia seleccionada co pigmento oleoso adecuado, outorgándolle á obra, a luz e a transparencia debida en cada caso. A súa é unha pincelada máis xestual e dinámica cunha forte carga matérica e cores máis intensas, remitindo ao máis esencial da arte contemporánea, reducindo aspectos formais e estruturais sen perder a especial fidelidade da artista no mundo construtivo.”
“Disconformes”, é unha mostra que nos emite unha pincelada de esperanza, forza e ilusión; cada obra ten unha historia que a pintora quere achegar ó público provocando sensacións, ideas e conclusións.