Monforte de Lemos, 8 de marzo de 2022. O Concello de Monforte, desde a súa Concellería de Igualdade, e o Centro de Información á Muller (CIM) non son alleos á importancia que ano a ano adquiren as actividades que se organizan arredor do día 8 de marzo, día Internacional da Muller.
Deste xeito, na mañá de hoxe, tivo lugar a Concentración oficial polo “Día internacional da Muller” que se levou a cabo diante da fachada da Casa Consistorial.
Neste acto, tivo lugar a lectura do Manifesto, que correu a cargo da Concelleira de Muller e Igualdade, Margarita López. Tamén estiveron presentes diversos membros da Corporación Municipal, así como as responsables do Centro de Información á Muller, traballadores e traballadoras municipais, e veciños e veciñas de Monforte.
Tras a leitura do Manifesto, dúas alumnas do Conservatorio Municipal Mestre Ibáñez, Iara Rodríguez González e Lujie Prieto Robisco, interpretaron unha obra co seus violíns, un fragmento do “Canon en Re Mayor ” de Johann Pachelbel.
MANIFESTO 8 DE MARZO 2022, DÍA INTERNACIONAL DA MULLER
A superación da crise sanitaria, económica e social que vén de socavar os pilares do mundo, ten que pór o foco na figura da muller e pasar necesariamente polo seu reforzamento. O progreso é incompatible coa inxustiza e a mediocridade que presiden a discriminación por razóns de xénero.
A valía e dignidade da muller son incuestionables e non poden continuar -baixo ningún pretexto- ameazadas, minguadas nin tan sequera infravaloradas. Ademais de absolutamente irracional e inxusto, este comportamento lastra o desenvolvemento da humanidade en todos os eidos.
O proceso de rexeneración que estamos a emprender debe ser o fin desta histórica conta pendente para calquera sociedade que se considere civilizada.
É o momento de forxar xeracións de igualdade real e intrínseca, cuxas xentes non poidan sequera imaxinar outro modelo e repudien instintivamente calquera forma de discriminación ou ataque ás persoas, incluída a que se exerce sobre as mulleres.
Para iso todos os cambios, decisións e accións que se están a dar nestes tempos deben facerse dende a perspectiva de xénero: mesma consideración, mesmo trato, mesmas oportunidades, mesmas obrigas...
Os concellos somos a Administración da cidadanía, a que lle xera maior confianza. Temos un papel relevante na construción social en igualdade ao sermos quen ten máis capacidade para chegar aos corazóns e ás conciencias, cimentos estes máis determinantes no comportamento.
Neste contexto, desde o concello de Monforte de lemos proclamamos a igualdade de todas as persoas independentemente do seu sexo, reiteramos o noso compromiso coa defensa dos dereitos das mulleres e co obxectivo de que ocupen o lugar que lles corresponde (o mesmo que os homes). Así:
- Instamos a todos os organismos e entidades públicas e privadas, axentes sociais, sectores produtivos e á sociedade en xeral a subscribir esta declaración e aplicar os principios de igualdade de dereitos e responsabilidades entre mulleres e homes.
- Salientamos o inestimable e imprescindible valor da muller no desenvolvemento das persoas, da xeración de riqueza e do progreso da humanidade, e instamos á súa visibilidade.
- Denunciamos a inxustiza da desigualdade que persiste ata o de agora na sociedade que pon ás mulleres en situación de vulnerabilidade en múltiples eidos da vida. E comprometémonos a empregarnos activamente e a fondo para a súa corrección.
- Manifestamos o noso compromiso por aplicar todas as medidas posibles no seo das nosas organizacións e nos nosos ámbitos de influencia.
- Sinalamos a obrigatoriedade de coordinar e sumar as máximas sinerxías posibles na búsqueda da igualdade, aumentara esforzos e medios e dar prioridade a este obxectivo.
- Comprometémonos a aportar e impulsar este proceder dentro das nosas posibilidades.
Por último non quero esquecerme das mulleres que están en zonas de guerra nas que se engade unha tóxica combinación de desigualdade, discriminación e conflito social.
Agora déixovos con dúas alumnas do Conservatorio Municipal Mestre Ibáñez, Iara Rodríguez González e Lujie Prieto Robisco, que van a interpretar unha obra co seus violíns, un fragmento do “Canon en Re Mayor ” de Johann Pachelbel.
Non me queda máis que darvos as grazas pola vosa presenza neste acto.
Margarita López Rodríguez
Concelleira de Muller e Igualdade de Monforte de Lemos