Actualidade

XORNADAS DE XOGOS DE MESA EN GALEGO, MÉRCORES 30 DE NOVEMBRO DE 2022 NA CASA DA CULTURA

O mércores 30 de novembro ás 18:00 h e na Casa da Cultura Poeta Lois Pereiro terá lugar a realización dunha sesión de "Xogos de mesa en galego: xogar, aprender, medrar" de Brazolinda, actividade deseñada dentro da programación da Rede Galega de Dinamización Lingüística da Xunta de Galicia de 2022 en Monforte de Lemos.

Espectáculo gratuito dirixido a un público infantil e familiar con xogos de mesa en galego para promover o xogo en familia. Empregaranse nesta xornada xogos de Brazolinda, de creación propia, en galego e deseñados para que poidan xogar xuntos grandes e pequenos. estes xogos teñen unha grande aceptación entre as familias e tamén se empregan como material didáctico nas aulas, pois a través das matemáticas, expresión oral, mitoloxía galega, Camiño de Santiago, adiviñas, ... fomentan non só a aprendizaxe de contidos senón tamén a introdución do galego en calquera ámbito, favorecendo ao mesmo tempo a socialización.

O Concello de Monforte realiza esta actividade de promoción do uso da lingua galega como parte do proxecto cultural TeCe redes en galego do Fondo Xacobeo 21-22 da Secretaría Xeral de Política Lingüística.

ESPECTÁCULO DO MAGO TETO /ALQUIMIA domingo 4 de decembro ás 18:00 h no Edificio Multiusos

O domingo 4 de decembro ás 18:00 h no Edificio Multiusos de Monforte o Concello de Monforte de Lemos programa dentro da Rede de Teatros e Auditorios da Xunta de Galicia un espectáculo para público infantil e familiar do MAGO TETO titulado ALQUIMIA.

Durante milleiros de anos, os alquimistas, nómades con grandes coñecementos nas matemáticas, na física, na química, na astroloxía e incluso no ocultismo, viaxaron cos seus laboratorios ambulantes por todos os lugares do mundo cun obxectivo concreto. Ese obxectivo era atopar a Pedra Filosofal.

O soño dos alquimistas era dominar a natureza, o lume, e finalmente o tempo. Os alquimistas crían que a pedra filosofal podería concederlles tanto a cura de todas as enfermidades para gozar da vida eterna como a riqueza, transformando metais en ouro. Cando conseguían estes logros, coñecíase como "A gran Obra".

Nesta nova aventura, o mago Teto, tras varios anos estudando, experimentando e intentando descifrar a estraña simboloxía dos libros sobre alquimia, ponse na pel dos alquimistas perseguindo o seu soño e buscando a pedra filosofal; non para conseguir a riqueza e a vida eterna, senón a alquimia que está dirixida ao corazón, ¡¡a felicidade!!.
A felicidade do público e do propio mago e así lograr a súa "Gran Obra".

Auga, terra, lume e aire farán posible esta nova aventura do mago Teto.

O prezo da entrada xeral para esta obra será de cinco euros e tres para nenos, desempregados, xubilados e estudantes.