O número de participantes admitidos/as na XII Feira Medieval de Monforte, que se celebrará os días 19 e 20 de abril, supera amplamente os da edición do ano 2013.
En total presentáronse 106 solicitudes de instalación de postos de variada índole, das cales só foron admitidas 95, aquelas que cumprían tódolos requisitos recollidos nas bases da convocatoria.
Do total das solicitudes admitidas, 38 corresponden a postos de artesanía, 28 a comercio e 29 a postos de alimentación. Houbo 11 peticións que non foron aceptadas por non cumprir cos requisitos documentais esixidos pola organización, 8 eran de postos de artesanía e 3 de postos de comercio. Das 95 peticións admitidas, 76 presentaron toda a a documentación requirida, mentres que 19 teñen pendente a remisión dalgún documento.
A delegación de Cultura púxose en contacto coas 19 persoas que deben completar a documentación indicándolles que poderán facelo ata o xoves día 3 de abril e que, de non ser así, quedarían excluídos da XII Feira Medieval.
As persoas admitidas para participar na XII Feira Medieval de Monforte de Lemos deberán formalizar a súa inscrición realizando o pagamento das taxas entre o día 1 e o día 8 de abril. Aquelas persoas que non cumpran con este trámite imprescindible quedarán automaticamente excluídas da Feira.
As solicitudes para participar na Feira superaron as recibidas o ano pasado, edición na que se presentaron 73 peticións das que 63 foron admitidas.
