O Alcalde anunciou hoxe a nova obra que se vai facer na rúa Cobas, tralo asfaltado que xa se realizou nesta vía a comezos de ano.
“Desta volta o que se vai facer é renovar o firme dende a rúa Tomás Vázquez ata a entrada da parroquia de Piñeira, é dicir, con esta actuación imos conseguir a renovación completa da rúa Cobas, incluída a praza”, explica o Alcalde, José Tomé. O mandatario local engadiu que, “actualmente esta rúa está en moi mal estado, ten fochancas e varios desniveis”.
A obra vaise facer nunha lonxitude de preto de 900 metros e nunha anchura media de 6,20 metros.
Cómpre destacar que nos primeiros 600 metros vaise realizar a ampliación da calzada a seis metros.
Esta obra, que previsiblemente comezará a finais de setembro ou comezos de outubro, suporá un investimento de preto de 60.000 euros. Con todo, o Alcalde matizou que “esta cantidade, sumado ó que custou o tramo que xa arranxamos en Cobas, suporá un investimento total de 100.000 euros”. O prazo de execución das obras será de 3 semanas.
O rexedor subliña que “cando rematen as obras cambiará o aspecto e o conxunto de barrio de Cobas, de ser vía rural pasará a ter características urbanas”.