Monforte de Lemos, 11 de marzo de 2021. O Concello de Monforte, a través do departamento de Servizos Sociais e Igualdade, continúa a traballar na inclusión social do colectivo xitano, a través do “Programa de Desenvolvemento Xitano do Concello”.
Deste xeito, nos últimos meses leváronse a cabo accións formativas para promover unha mellora nas habilidades sociais e competenciais deste colectivo, co fin de acadar a tan desexada integración social na comunidade monfortina.
Así, en decembro de 2020 levouse a cabo un Cursiño de cociña elemental impartido polo cociñeiro Martín Mantilla e no que participaron 22 persoas que elaboraron pratos básicos como peixe ó forno, purés, guarnicións con verdura, etc... A finalidade última que perseguiu este curso formativo foi que os participantes adquirisen hábitos alimenticios correctos e, a súa vez, promover unha melloría notoria no seu estado de saúde xeral.
Por outra banda, o pasado mes de febreiro de 2021, tivo lugar un Obradoiro de pintura, no que se levou a cabo o pintado de instalacións do Mercado Gandeiro de Monforte. O obxectivo deste obradoiro foi a promoción de competencias e destrezas persoais a través dunha acción formativa práctica que favorecese, no futuro máis inmediato, ó acceso ó mercado laboral dos participantes.
O Programa de Desenvolvemento Xitano inclúe ademais actuacións de apoio á inclusión residencial, mediación social e intercultural, prestación de reforzo socioeducativo das persoas menores de etnia xitana en idade escolar obrigatoria así como apoio á inclusión básica a través do fortalecemento de capacidades persoais e sociais e formación dixital e en competencias clave.
Este programa está subvencionado pola Consellería de Política Social da Xunta de Galicia e cofinanciado polo Fondo Social Europeo Galicia 2014-2020, para o período comprendido entre o 1 de decembro de 2019 e o 30 de xuño de 2021.
Para máis información acerca deste tipo de programas e accións, todos os interesados e interesadas poden dirixirse ás oficinas dos Servizos Sociais Municipais, emprazados no primeiro andar do Centro Cívico Social, no Paseo do Malecón s/n de Monforte, ou no teléfono 982 41 65 41.
