A 22ª edición da Mostra Artelemos arrinca mañá cunha aposta decidida do Concello de Monforte pola artesanía de calidade

Monforte de Lemos, 4 de agosto de 2022. A XXII Mostra de artesanía Artelemos 2022 celebrarase en Monforte de Lemos dende mañá venres 5 e ata o 9 de agosto na rúa Cardenal, e sendo, como cada ano, a antesala das Festas Patronais da cidade, dentro do noso Programa Cultural de Verán.

Nesta mostra participan de 23 profesionais da artesanía, provintes da comarca de Lemos, así coma outros puntos de Galicia e de España, que, coma en anos anteriores, ubicaranse na rúa Cardenal, en postos de exposición e venda individuais e agrupados en 6 haimas de 25m2 cada unha, con espazo para 4 artesáns por carpa. A maiores colocarase un espazo destinado á realización de obradoiros e demostracións de oficios.

A Mostra será inaugurada mañá venres 5 de agosto ás 11:30 h da mañá, contará coa actuación do Grupo Municipal de Gaitas do Concello, e poderase ver en vivo a elaboración de pezas, con diversas demostracións ó longo dos días de duración do evento.

O horario durante os 5 días que durará a Mostra Artelemos será, pola mañá, de 10 a 14 horas, e pola tarde, de 18 a 22 horas.

O Concello destinou un orzamento de arredor de 12.000 euros para a organización desta 22ª edición de Artelemos.

 

Artelemos, unha mostra consolidada que aposta pola artesanía

Artelemos é o escaparate dos pequenos obradoiros artesanais que están a traballar no noso territorio rural, espallados por toda a xeografía galega, e que gardan a identidade de oficios tradicionais conxugándoa con tendencias actuais.

“Con esta Mostra”, explicara o Alcalde José Tomé Roca no día da presentación deste evento, “contribuímos a dinamización dos oficios e dos produtos artesanais locais, o que nos serve tamén para reforzar a promoción turística tanto de Monforte, como da comarca de Lemos e a Ribeira Sacra no seu conxunto”.

O obxectivo de Artelemos é achegar a artesanía local á xente na rúa, unha artesanía tradicional, e tamén máis moderna, cunha ampla variedade de disciplinas artesanais que os clientes esperan atopar: coiro, cestería, barro, olería, pintura, complementos, xoiaría, xoguetería, cerámica … En definitiva, unha inmellorable ocasión para atopar pezas únicas e de gran calidade, xa que todos os artesáns participantes contan con acreditación profesional.

Na Mostra haberá diferentes obradoiros para nenos e nenas;  estas actividades, que son un complemento á propia Mostra, organízanse ano a ano porque sempre acadaron un notable éxito entre o público asistente. 

 

Programación 22ª Mostra Artelemos 2022

Venres 5 de agosto: 

10:00 h.- Apertura de Stands de venda

11.30 h.- Inauguración oficial da 22ª Mostra Artelemos. Actuación Grupo Municipal de Gaitas.

12:00 a 14:00 h.-  Demostración Olería de Gundivós. Artesán: Elías González

18:00 h.- Apertura de Stands de venda

19:00 a 21:00 h.- Obradoiro de Cestería para nenos e nenas.  Artesá: Luisa Martínez.  inscripcións por orde de chegada, 10 minutos antes,ata cubrir as prazas (20).

20:30 a 22:00 h.- Demostración Olería de Gundivós. Artesán: Elías González

 

Sábado 6 de agosto:     

10:00 h.-Apertura de Stands de venda

12:00 a 14:00 h.- Obradoiro de barro para nenos e nenas.  Artesá: Amparo Scrich

18:00 h.- Apertura de Stands de venda

19:00 a 21:00 h.-  Obradoiro de barro para nenos e nenas.  Artesá: Amparo Scrich

 

Domingo 7 de agosto: 

10:00 h.- Apertura de Stands de venda

12:00 a 14:00 h.- Demostración de estampación “Cianotipia”. Artesá: Pilar Gonda

18:00 h.- Apertura de Stands de venda

19:00 a 21:00 h.- Obradoiro de Cianotipia para nenos e nenas. Artesá: Pilar Gonda

 

Luns 8 de agosto:          

10:00 h.- Apertura de Stands de venda

12:00 a 14:00 h.- Demostración Obradoiro de Encaixe de palillos. Artesá: Sesé Vila

18:00 h.- Apertura de Stands de venda

19:00 a 21:00 h.- Demostración Obradoiro de Encaixe de palillos. Artesá: Sesé Vila

 

Martes 9 de agosto:

10:00 h.- Apertura de Stands de venda

12:00 a 14:00 h.- Demostración Olería tradicional da Ribeira Sacra. Artesán: Tomás López

18:00 h.- Apertura de Stands de venda

19:00 a 21:00 h.-             Demostración Olería tradicional da Ribeira Sacra. Artesán: Tomás López

19:00 a 21:00 h.- Obradoiro de Olería para nenos/as.  Artesá: Otilia Arias