Monforte de Lemos, 28 de setembro de 2023. O Alcalde de Monforte e Presidente da Deputación de Lugo, José Tomé Roca, acompañado pola 1ª Tenente de Alcalde, Gloria Prada, asistiu na tarde noite de onte á presentación no Palacio de Liria de Madrid, do último libro da escritora e historiadora monfortina Manuela Sáez, “Vida y obra del VII Conde de Lemos, Don Pedro Fernández de Castro”.
No acto, estiveron presentes entre outras moitas autoridades, o Embaixador de Italia en España, Giuseppe Buccino Grimaldi (que é napolitano), e o actual XXIII Conde de Lemos e XIX Duque de Alba, D. Carlos Fitz-James Stuart y Martínez de Irujo, acompañado do seu fillo maior e próximo herdeiro, D. Fernando Fitz-James Stuart y Solís, XVII Duque de Huéscar, con quen o Alcalde aproveitou para departir sobre Monforte e a Ribeira Sacra, trasladándolle a invitación verbal que foi aceptada e que se formalizará proximamente.
A invitación oficial será cursada polo Alcalde á Casa de Alba ao longo do mes de outubro. Tal e como acordaron na reunión mantida, a visita terá lugar en data a concretar durante a primavera-verán do próximo ano 2024.
Na intervención feita polo Duque de Alba durante a presentación do libro, este amosouse moi orgulloso de ostentar o título de Conde de Lemos, “xa que é un dos máis grandes e antigos da Casa de Alba”.
O Concello contribúe na edición do libro sobre a vida e obra do VII Conde de Lemos
O Concello de Monforte contribuíu na coidadosa edición e na financiación deste libro, debido a que o VII Conde de Lemos é unha figura moi relevante dentro da historia monfortina, e que deixou unha profunda pegada en eidos tan importantes como a política, a sociedade ou a cultura.
Deste xeito, o Concello distribuirá exemplares deste libro, que consta de dous volumes, na Biblioteca Municipal Poeta Lois Pereiro, así como nos diferentes centros educativos de educación primaria e secundaria de Monforte. “O resto de exemplares dos que dispón o Concello serán entregados en visitas institucionais, debido a que o VII Conde de Lemos é unha figura que debe ser dada a coñecer polo que significa dentro da historia de Monforte”, destacou o Alcalde.