Monforte de Lemos, 25 de xuño de 2024. O Alcalde de Monforte, José Tomé Roca, ben de informar que as brigadas municipais do Concello iniciaron hoxe martes 25 de xuño os traballos de limpeza e acondicionamento da lagoa do Parque dos Condes. Nesta labor de limpeza contan co apoio da empresa Excavaciones y Transportes Ayán S.L.
A limpeza da lagoa do Parque dos Condes é levada a cabo, ano a ano, dende que José Tomé Roca chegou ó goberno de Monforte. Neste senso, este foi e é un dos seus compromisos para manter en bo estado esta zona da cidade. “A chegada de visitantes, co inicio dos meses de verán e a ubicación privilexiada da Lagoa, no centro da cidade e integrada nun dos parques máis utilizados polos monfortinos e monfortinas, fai máis que necesaria a súa limpeza, que dende o Concello levamos a cabo ano a ano por estas datas”, indica o rexedor municipal.
É a décima limpeza que desenvolve o Executivo de José Tomé na Lagoa dos Condes, dende a súa chegada ao goberno municipal en 2015.
Traballos de limpeza
O primeiro dos pasos para a limpeza da Lagoa do Parque dos Condes, consiste no baleirado da auga, baleirado que se levará a cabo utilizando unha máquina motobomba para extracción de líquidos.
Posteriormente, procédese a extraer cunha máquina paleadora todo o lodo que se foi depositando no fondo da lagoa durante este inverno.
Para desenvolver ditos traballos, emprégase unha bomba cuxo aluguer ascende a 300 euros, mentres que o custe dos traballos da empresa contratada ascenden a aproximadamente 5.000 euros.
“A lagoa é un dos espazos máis emblemáticos da nosa cidade. Co Parque dos Condes ao seu redor trátase dunha das zonas que atrae un maior número de visitantes e tamén é un dos lugares máis frecuentados polos veciños e veciñas para dar paseos”, destaca o Alcalde.
O mandatario municipal engade que “por iso, consideramos que a limpeza e o mantemento da lagoa é unha tarefa imprescindible para poder dar unha boa imaxe, para que os monfortinos e monfortinas desfruten da mesma, e que esta zona sexa unha das nosas mellores cartas de presentación”.
Complementando os traballos de limpeza da lagoa, operarios municipais procederán tamén a desbrozar o entorno da mesma, “todo isto para conseguir que esta zona da cidade presente unha imaxe o máis apropiada posible”, indica o mandatario local.