Actualidade

O Concello de Monforte de Lemos dentro das actividades do NADAL 2024, programou o tradicional CONCURSO DE BELÉNS PARA CENTROS DE ENSINO DE MONFORTE DE LEMOS.

Bases:

1-  A Delegación de Cultura do Concello de Monforte de Lemos, convoca un CONCURSO DE BELÉNS PARA CENTROS DE ENSINO DE MONFORTE.

2- Poderán participar todos os centros de ensino monfortinos que o desexen, soamente se permitirá a presentación dun belén por centro.

3- Valorarase a orixinalidade, o traballo e a presentación artística.

4- As solicitudes de inscrición para a participación no certame presentaranse no Rexistro Xeral do Concello de Monforte, sendo o derradeiro día o 13 de decembro ás 14:00 h. Todas aquelas solicitudes presentadas fóra deste prazo serán desestimadas calquera que sexa a causa do seu atraso.

5- O XURADO cualificador do concurso visitará os centros participantes o 16 de decembro e a súa decisión será inapelable. Os premios faranse públicos o 17 de decembro nos medios de comunicación.

O xurado estará composto por:

PRESIDENTE: A Delegada de Cultura ou persoa á que designe.
VOCAIS: Persoas relacionadas coa cultura local.
SECRETARIO: O técnico de Cultura do Concello de Monforte, con voz e sen voto, que certificará o cumprimento das condicións establecidas nas bases do concurso.

O xurado terá liberdade de criterio para establecer as súas cualificacións, sendo os criterios a valorar os seguintes: a montaxe, a elaboración, os materiais utilizados, a orixinalidade o interese etnográfico e calidade do belén.

6- A participación neste concurso supón a total aceptación das bases e a súa interpretación correspóndelle exclusivamente ó Xurado, sendo a súa decisión inapelable.

7- PREMIOS

Haberá un primeiro, un segundo, un terceiro premio e un accésit.

Se o xurado o considera oportuno poderá conceder dous primeiros, dous segundos, dous terceiros premios ou tres accésits, sempre que a suma total dos premios concedidos no concurso non supere os 510 €.

Os premios serán indivisíbeis e poderá quedar deserto algún deles, segundo a decisión do xurado do concurso.

/1º premio de 100 euros  /2º premio de 80 euros  /3º premio de 50 euros  /Accésit 30 euros

Os aboamentos dos premios serán tramitados na forma indicada pola Tesourería do Concello de Monforte de Lemos, a través dunha transferencia bancaria.

O Concello de Monforte de Lemos dentro das actividades do NADAL 2024-25, programou o tradicional CONCURSO DE BELÉNS PARA CENTROS DE ENSINO DE MONFORTE DE LEMOS

PREMIOS CONCURSO DE BELÉNS PARA CENTROS DE ENSINO NADAL 2024-2025 CONCELLO DE MONFORTE DE LEMOS:

1º premio    Escola Oficial de Idiomas   100 €
1º premio    Colexio PP Escolapios         100 €
2º premio    Colexio A Gándara                80 €
2º premio    CEIP de Monforte                  80 €
3º premio    Colexio Infanta Elena           50 €

Do 9 de decembro de 2024 ó 9 de xaneiro de 2025 e na Sala de Exposicións da Casa da Cultura Poeta Lois Pereiro poderase visitar BELÉNS DIORAMA.

1 belén principal e unha colección de 5 beléns diorama con diferentes temáticas conforman iste ano a montaxe de D. J. Antonio Dávila.

O Concerto de Corais que supón ano tras ano unha cita tradicional e moi querida polos monfortinos e monfortinas dentro da programación do Nadal 2024, terá cita o sábado 21 de decembro ás 19:00h na Igrexa da Nosa Señora da Antiga -Real Colexio PP. Escolapios coa actuación das corais CORO ENSAMBLE VOCAL GIJÓN, CORO DE VOCES GRAVES DE VIGO e a CORAL POLIFÓNICA CONCELLO DE MONFORTE.

Monforte de Lemos terá o vindeiro martes 24 de decembro a visita do APALPADOR, os monfortinos xunto cos visitantes a nosa cidade poderán disfrutar deste típico personaxe polas rúas de Monforte dende ás 11:30h, o Apalpador virá acompañado dun músico amigo seu.

O Apalpador, o mítico personaxe da tradición popular galega, nado no Courel, ligado ás festas do Nadal, grandullón, bo, de mirada doce e longas barbas coloradas, que durante o ano fabrica carbón, vive dos froitos silvestres, da caza de xabaríns, que recolle mel e fai aparecer coas ramas dos bosques os xoguetes que as madeiras esconden, percorrerá co seu abrigo cheo de remendos e a grandes zancadas xunto cun músico amigo seu as rúas da nosa cidade de Monforte a mañá do 24 de decembro.

Esta animación corre a cargo de Anxo Moure (apalpador) e Servando Barreiro (músico).

O salón de actos do Edificio Multiusos acollerá o xoves 26 de decembro ás 18:00h unha representación teatral con entrada libre e gratuita para público infantil e familiar da compañía TRÉCOLA PRODUCIÓNS.

O espectáculo leva por título "COA MÚSICA A OUTRA PARTE" . A autora e directora é Isa G. Coldeira e o elenco é Ero Vázquez Cabrera e Raquel López Cendán.

Coa música a outra parte é unha comedia de luva e música en directo. catro historias entrelazadas forman este enredo baseado en varias obras de Rafael Dieste ás que Trécola lle dá unha volta, engadindo escenas de colleita propia e actualizando o seu argumento con temáticas combativas e irreverentes, para darlles un toque divertido e provocador.

A representación forma parte do Circuíto de Teatro Profesional organizado pola Vicepresidencia da Deputación de Lugo no ano 2024.

O Concello de Monforte de Lemos dentro da programación do Nadal 2024-25, programa a ALBERTE MONTES, co espectáculo PATRÓN na Casa da Cultura Poeta Lois Pereiro o venres 27 de decembro ás 20:00 h, con entrada libre e gratuita.

PATRÓN é un espectáculo moi especial. Unha homenaxe a esa figura icónica da cultura popular galega. Ese cabeza de familia, xefe da cuadrilla, ese pureta que se cre máis e con máis poder do que en realidade ten.
 
Alberte vaise facendo maior e cre estar entrando nun proceso de “empatronamento”. Tics, manías, xeitos de facer estanlle marcando o camiño. A súa vida cambiou un chisco nos últimos tempos. Vai quedando atrás o Alberte mozo, que saía un martes e non tiña resaca o mércores, que durmía máis cas mantas ou que non tiña que preparar o IVE trimestral. Neste espectáculo, Alberte tamén renderá tributo ó patrón de referencia, seu pai.  

ALBERTE MONTES é actor e cómico. Formado no Estudi Nancy Tuñón i Jordi Oliver de Barcelona, segue ampliando os seus recursos actorais en distintos cursos de expresión corporal, voz, cásting, clown ou loita escénica.
En teatro acumula máis de quince anos como profesional, tendo xirado por España en compañía e con espectáculos propios de stand up comedy. Como cómico conta preto de 1.000 actuacións en directo e dous monólogos gravados para CENTRAL DE CÓMICOS, programa de Comedy Central. Ten actuado xunto a cómicos coma Ignatius, Toni Moog ou Carlos Blanco. Colaborou en programas de humor como BUENAS NOCHES Y BUENAFUENTE ou EN EL AIRE de El Terrat, e outros da TVG, entre os que destacan, LAND ROBER ou LUAR. Na súa faceta de colaborador e reporteiro participou dos programas LOS LUNES AL GOL e LOS INFILTRADOS ámbolos dous da canle Gol TV.
Como actor participou recentemente en BIRD BOX,película de Álex e David Pastor. Púidoselle ver tamén noutras como EL OLIVO de Icíar Bollaín ou EC 4 de Jaume Balagueró. Na Televisión de Galicia protagonizou as series de comedia DO DEREITO E DO REVÉS e AUGASQUENTES. Interveu ademais en VIDA PERFECTA ou MATAR AL PADRE, ámbalas dúas de Movistar+. Actualmente forma parte do elenco de EL PUEBLO (Amazon/Telecinco) e foi un dos protagonistas de FARIÑA (Netflix/Antena3). É tamén guionista, director e locutor.

O Concello de Monforte de Lemos e dentro da programación do Nadal 2024-25, programa un ESPECTÁCULO TEATRAL PARA PÚBLICO INFANTIL-FAMILIAR titulado CACHOPO MÁXICO da compañía LILÁ TEATRO, espectáculo que terá lugar na casa da Cultura Poeta Lois Pereiro o venres 3 de xaneiro ás 18:00 h.

Nunha pequena porción de terra enriba dun monte que non se atopa en ningún mapa por ser demasiado pequeno, ademais de estar algo perdido entre brétemas do esquezemento, se pode divisar unha casiña humilde e fermosa que nunca deixa de votar fume pola súa torta chimenea. A lí vive unha familia moi singular ao tempo que bastante plural. Isto quere dicir que noma eles non hai outros. Son a familia Palpatore.

Non se sabe moi ben de onde veñen nin tampouco se sabe a onde queren chegar. Os palpatore son extraordinarios e teñen aspectos moi diferentes entre sí coma todas as familias. tamén c, como todas as familias, gardan grandes segredos.

Ó chegarse o Nadal, a familia Palpatore comeza a ferver. Toca traballar sen descanso duranate todo un mes e non están afeitos a tanto traqueteo. Eles son os mellores coñecedores de toda a maxia que acontece nestas datas de culto e celebración.

O Cachopo Máxico é unha alegre interpretación do Nadal dende a perspectiva dos costumes galegos máis antigos que cuestiona a influencia da modernidade sobre a cultura popular e reivindica os bos saberes ancestrais.

A representación teatral está deseñada para público infantil familiar, con entrada libre e gratuita.

As súas maxestades os Reis Magos volverán visitar o 5 de xaneiro a nosa cidade para facer realidade as ilusións de nenos e nenas.

Chegarán como é costume á Estación do ferrocarril de Monforte ás 17:30 h, alí saudarán a todos os nenos e nenas que os estean esperando e a continuación percorrerán diversas rúas da cidade ata chegar á Casa do Concello de Monforte de Lemos.

A COMITIVA REAL, integrada por catro carrozas cos reis e paxes formados por alumnos de sexto de primaria dos centros de ensino da cidade, con diversos grupos musicais e decorativos, farán un percorrido ás 18:30 h dende a Praza da Estación, polas rúas de Leopoldo Calvo Sotelo, Roberto Baamonde, Cardeal e a Avda. de Galicia, finalizando no Campo de Santo Antonio ante a Casa do Concello, onde os Reis Magos serán recibidos polo Sr. Alcalde do Concello de Monforte de Lemos e demais autoridades.

A continuación as súas maxestades lerán o discurso de reis dende os balcóns do Concello, finalizando a súa visita recibindo ós nenos e nenas na planta baixa do Concello.

O Concello agradece a colaboración de Renfe, Adif e Amafer para a realización da Cabalgata de Reis, así como ós centros de ensino CEIP Monforte, PP. Escolapios, Fundación Educativa Torre de Lemos, Colexio P. Ferroviario e CEIP A Gándara.