Monforte de Lemos, 2 de novembro de 2021. A programación da Rede Galega de Teatros e Auditorios continua en Monforte de Lemos este xoves 4 de novembro ás 20:15 horas no Edificio Multiusos coa posta en escena da terceira obra correspondente a este ciclo, Dreaming Juliet da compañía Elefante Elegante. É unha obra composta por Gonçalo Guerreiro, adaptada por María Torres e Gonçalo Guerreiro e protagonizada por María Torres, Gonçalo Guerreiro, Marta Alonso, Nacho Martín e Mighelón Paz.
O prezo da entrada xeral para esta obra será de cinco euros e tres para desempregados, xubilados e estudantes, sendo o aforo limitado seguindo a normativa sanitaria no momento da realización do espectáculo.
A venta de entradas farase dende unha hora antes da actuación ás 19:15 h e a entrada o salón de actos realizarase ás 20:00 h.
Sinopse
“Dreaming Juliet” é a nova creación para público adulto da compañía Elefante Elegante. O espectáculo inspírase na peza "Romeo e Xulieta" de W. Shakespeare para abordar a cuestión máis esencial da existencia humana: o amor.
A paixón, a familia e a maternidade son os temas intrínsecos da obra e o teatro físico e visual a ferramenta da creación.
A peza do dramaturgo inglés é un referente universal porque os seus protagonistas logo de amarse desenfreadamente teñen un funesto final.
Dreaming Juliet pretende reflexionar sobre o futuro de Romeo e Xulieta no caso en que non tivesen morto. Que lle acontecería ó seu profundo amor se acabasen formando familia e tivesen que enfrontar a rutina de tódolos días?.
A seguinte obra do ciclo de teatro para adultos programado polo Equipo de Goberno do Concello de Monforte será O charco de Ulíses do Centro Dramático Galego que terá lugar o xoves 18 de novembro no Edificio Multiusos ás 20:15 h, sendo o prezo da entrada xeral de cinco euros e de tres euros para estudantes, desempregados e xubilados.