Monforte de Lemos, 11 de xuño de 2021. O Concello de Monforte e a Secretaría Xeral de Política Lingüística programa para o venres 18 de xuño ás 20:00 h no salón de actos da Casa de Cultura Poeta Lois Pereiro, dentro dos actos das Letras Galegas 2021, a proxección do documental titulado “Xela Arias, Poeta nas marxes”, documental homónimo dirixido por Beatriz Pereira arredor da autora homenaxeada o pasado 17 de maio pola Real Academia Galega.
A partir dos testemuños de Marga do Val, Xosé María Álvarez Cáccamo, María Xesús Nogueira, Manuel Bragado, Susana Trigo e Humberto Heredia, o documental percorre a vida e obra dunha "francotiradora das letras", deténdose en todas as arestas que fixeron de Xela Arias unha muller situada nas marxes da literatura, analizando o seu labor como poeta, tradutora e correctora, así como o seu impacto na vida cultural galega.
A proxección é con entrada gratuíta e vai dirixida a todos os públicos desde os 12 anos de idade. O aforo do salón é limitado debido á actual situación sanitaria, polo que haberá reserva previa e por orde de inscrición de entradas, que se poderá levar a cabo enviando un correo electrónico a cultura@concellodemonforte.com e chamando ó 982 402 501, ata completar a capacidade do local.
Do mesmo xeito, debido a situación sanitaria é obrigatorio o uso de máscaras, haberá que gardar a distancia de seguridade e usar a solución hidroalcohólica para a desinfección de mans, dispoñible á entrada do salón.
A entrada ó salón de actos realizarase dende as 19:45 horas.