Monforte de Lemos, 20 de marzo de 2024. O Alcalde de Monforte, José Tomé Roca, deu a coñecer hoxe en rolda de prensa, o anteproxecto de renovación da Piscina municipal de Monforte, “unha obra de moita envergadura como é facer unha piscina practicamente nova, deixando solo parte da estrutura”. Unha piscina que terá unha imaxe semellante ao novo Pavillón polideportivo de A Pinguela, para manter a harmonía do entorno. Na rolda de prensa estivo acompañado pola Tenente de Alcalde, Gloria Prada, o concelleiro de Obras e Servizos, José Luis Losada, e o técnico de Deportes, Óscar Rodríguez.
Esta nova actuación anunciada enmárcase “no meu compromiso como Alcalde é transformar e mellorar o Concello de Monforte e todas e cada unha das súas vertentes, chegando ás parroquias e a todos os barrios, como vimos demostrando coa nosa xestión ao longo destes 8 anos de Goberno”.
José Tomé explicou que unha das zonas da cidade que tivo unha transformación moi positiva é a zona da Pinguela, coa mellora das súas rúas, o novo parque Covas-Pinguela, o novo pavillón de deportes, a mellora de todo o espazo destinado para estacionamento ou as melloras do Campo de Fútbol. Tamén anunciou que “temos en proxecto arranxar as pistas de tenis e dotar de iluminación dos estacionamentos desta zona”.
“Esa parte da cidade”, subliñou o rexedor monfortino, “mellorou moitísimo a súa calidade residencial, pero isto ímolo completar co arranxo integral da Piscina municipal, que igual que ocorreu co pavillón imos facer unha piscina practicamente nova”.
Este anteproxecto é froito de moitos meses de “xestións discretas” por parte do Alcalde para conseguir a financiación necesaria para acometer unha obra desta envergadura.
As obras van supoñer un cambio absoluto das instalacións, cambiando practicamente todo: a entrada, a cafetería, o ximnasio, os vestiarios ou os propios accesos interiores á piscina. Todo elo cunha nova imaxe externa e interna, facendo das novas instalacións unha dotación realmente bonita.
Este anteproxecto de reforma integral da Piscina municipal de A Pinguela, “é unha actuación moi necesaria na que levamos a traballar dende fai moito tempo”, e que vai a dar servicio tanto ó club de natación do municipio, coma ós 1.883 usuarios habituais (1396 abonados e 487 participantes en cursos de natación) cos que actualmente conta esta piscina, “que é o número máis alto de abonados que tivo a piscina ata agora”.
“Logo da reforma”, salientou José Tomé, “os monfortinos e monfortinas contarán cunha piscina moderna, segura, eficiente, sostible e en estado óptimo de utilización”.
Investimento millonario para a nova Piscina municipal
As moitas xestións e moitas viaxes a Madrid levadas a cabo polo Alcalde, van permitir facer un novo investimento millonario, en concreto para a renovación total da Piscina municipal, vanse investir 2.047.009,42 €.
Dentro do orzamento as partidas que supoñen unha maior inversión son as destinadas á climatización (358.567,44€), revestimentos exteriores (163.224,53€), electricidade, iluminación e telecomunicacións (113.335,75€) e albanelaría (107.017,38€).
O Alcalde, desglosou o financiamento do proxecto da seguinte forma:
- O Consello Superior de Deportes acaba de comunicar, ó pasado 12 de marzo, ó Concello a concesión dunha subvención de 644.882,94€, o que representa o 31,5% do investimento.
- A Deputación Provincial de Lugo tamén vai aportar, a través dun convenio co Concello, 600.000€ en 2 anualidades, 300.000€ en 2024 e outros 300.000€ en 2025, o que supón o 29,3%.
- O Concello, pola súa parte, vai aportar 802.126,48€, o que representa o 39,2%.
Neste senso, José Tomé subliñou que “froito da colaboración destas tres administracións, Estado, Deputación e Concello, podemos acometer a mellora da piscina porque a Xunta de Galicia, nin está, nin se lle espera, porque o Secretario Xeral para o Deporte nos dixo que non podía colaborar. Pero facémola igual, porque somos capaces de xestionar sen eles”.
Da mesma forma, o Alcalde informou de que a licitación anunciarase ó longo da primavera, “onde faremos o mesmo que no pavillón, contratando proxecto e obra no mesmo procedemento”.
As obras comezarán a finais de setembro ou principios de outubro, e teñen que estar rematadas en setembro de 2025 “porque é o prazo que temos para xustificar as 2 subvencións, a do Consello de Superior de Deportes e a da Deputación Provincial de Lugo”.
Estado actual das instalacións
O edificio da piscina municipal data de principios dos anos 90, fai máis de 30 anos, e sobre ela non se levaron a cabo reformas de mellora de calado dende a súa apertura.
O edificio, en xeral, a estrutura, atópase en bo estado de conservación, aínda que esa non é a sensación que pode transmite a usuarios e visitantes.
As instalacións están deterioradas e non son funcionais para as necesidades de hoxe, polo que dende o Executivo de José Tomé decidiuse abordar e levar a cabo o proxecto para a súa renovación e reforma integral.
ACTUACIÓNS DE MELLORA INTEGRAL DA PISCINA MUNICIPAL
“Co proxecto que hoxe presentamos queremos crear unha nova imaxe atractiva e moderna para a piscina municipal, e en consonancia co Pavillón polideportivo anexo, creando sinerxias entre eles para acadar un conxunto de referencia na provincia” destacou o Alcalde de Monforte.
As actuacións interiores irán destinadas a devolver a funcionalidade ás instalacións e a amplialas, para dar servizo á crecente demanda por parte dos usuarios.
A zona do vaso de piscina manterase como está actualmente, ó atoparse, segundo os informes técnicos, en bo estado, pero realizarase unha intervención neste espazo para incorporar cunha nova zona de SPA, con sauna e jacuzzi, que completará a oferta lúdica e deportiva da piscina.
O groso da intervención de mellora céntrase nos espazos que dan servizo á propia piscina.
A entrada desprázase cara á esquina onde confluirá co Pavillón polideportivo, para crear unha zona de acceso común. Este cambio mellorará notablemente a funcionalidade da instalación ó posibilitar ter o control de acceso previo para ambas infraestruturas.
Os vestiarios centralizaranse e renovaranse, simplificando percorridos e facendo fincapé na separación entre zonas de “pés secos” e “pés húmidos”, de forma que os usuarios da piscina e os do ximnasio ou salas de actividades conflúan neste punto, pero sen mesturarse, o que derivará nunha mellora das condicións hixiénicas e sanitarias.
O ximnasio desprazarase á zona sur, ampliando a súa superficie e mellorando a súa funcionalidade.
Na planta baixa situarase a recepción e tras esta, dous vestiarios para grupos e un vestiario de persoal, ademais dun despacho para administración.
Completando o conxunto, crearase un núcleo de aseos para o público, e unha cafetería que dará servizo tanto á Piscina como ó Pavillón polideportivo, con vistas directas ós vasos, e saída directa ás bancadas reformadas.
Exteriormente, o edificio será revestido cunha “nova pel”, cun zócalo pétreo que alcanzará a altura das ventás. Esta nova fachada caracterizarase polas súas formas redondeadas, que actualizarán a imaxe do edificio en consonancia coa estética do Pavillón polideportivo que o Concello reformou en 2023. E esta nova fachada contribuirá de xeito decisivo a mellorar as condicións de aillamento térmico do edificio.
A superficie total de actuación é de 2.006,12 m2, e cunha superficie útil resultante de 1.792,46 m2.
Josñé Tomé destacou que “ó igual que no caso do novo Pavillón polideportivo, estou seguro de que o resultado tras esta reforma da Piscina municipal, será o de obter unhas instalacións de imaxe atractiva e contemporánea pero tamén cómodas, con todos os servizos á disposición dos veciños, veciñas e deportistas que seguro a converterán, xunto co pavillón, nun conxunto de referencia na provincia de Lugo e en Galicia”.
OUTROS ASPECTOS DESTACADOS DA REFORMA
Melloras en eficiencia enerxética e sostenibilidade
A actual instalación conta cun sistema de dobre produción de calor: unha bomba de calor xeotérmica para dar servizo ó quecemento de vasos de piscina, e unha caldeira de biomasa externa ao centro, que fornece calor mediante contrato de compra de enerxía, o cal fai que sexa ineficaz e ineficiente.
A mellora enerxética baséase na modificación da instalación térmica, unificando as producións de calor nun mesmo depósito de inercia de baixa temperatura, que permita aproveitar no mellor rendemento cada un dos sistemas.
A instalación dunha nova fachada e cuberta, permitirá acadar o illamento térmico necesario para optimizar a eficiencia enerxética do edificio.
Polo tanto, coa mellora da envolvente térmica do edificio e a substitución das actuais bombas de calor xeotérmicas por outras de última xeración reducirase drasticamente o consumo enerxético e as emisións de CO2 do conxunto para o seu funcionamento e confort térmico.
Ademais, esta “nova pel” cohesionará os diferentes volumes existentes no complexo deportivo da Pinguela, integrando a piscina no conxunto mediante unha unidade estética común.
Na Piscina, tamén será fundamental a xestión da auga e a súa reutilización. Para aquela que proceda das duchas e dos lavabos, cun baixo nivel de contaminación, rexenerarase con tratamento físico-biolóxico, para poder reutilizarse nas cisternas dos baños.
Melloras en accesibilidade
A reorganización de espazos que se realizará no conxunto do edificio, reordenando a zona de acceso, facendo máis eficientes os percorridos, eliminando as escaleiras que había para subir á cafetería e ampliando os espazos en xeral, fará que se consiga dotar ó edificio dun itinerario accesible ata cada unha das estancias, permitindo a autonomía de calquera persoa que acceda ó mesmo.
Crearase en cada un dos vestiarios, un vestiario accesible e a zona de cafetería tamén contará cun aseo accesible, así como acceso e zona reservada na bancada da área de piscina.
Completaranse estas actuacións coa instalación dun portillo no control de accesos, así como unha mellora na sinalética, co obxectivo de favorecer unha lectura fácil para adecuar o acceso á información a todos os posibles usuarios desta instalación.
Melloras en dixitalización
As melloras que se implantarán no referido a dixitalización e incorporación de novas tecnoloxías, “suporán un antes e un despois no sistema de xestión e dos servizos ofertados ós usuarios”.
Fundamentalmente, serán 3 as actuacións que se acometerán na mellora da dixitalización da Piscina:
1.- Sistema de monitorización da actividade: Coa instalación de NAGI, que é un sistema de xeolocalización precisa en tempo real, permitirá monitorizar a actividade e seguridade dos usuarios na piscina durante a súa práctica deportiva no vaso principal, co obxectivo de evitar calquera tipo de incidente ou afogamento.
Este sistema tamén axudará a controlar os aforos, o cal permitirá adecuar todas as actividades e programas deportivos á lexislación vixente en materia de espectáculos públicos, actividades recreativas e establecementos públicos ou sanitarias.
A implantación desta nova ferramenta dixital monitorizará todas as métricas e datos básicos da actividade dos nadadores, o cal contribuirá a que melloren a súa práctica e rendemento deportivo, tanto os deportistas que forman parte dos programas de tecnificación e dos clubs, como dos propios usuarios que utilizan a piscina para mellorar a súa condición física e saúde.
2.- Sistema integrado de xestión de edificios: A través del, que é un sistema similar ó instalado no Pavillón polideportivo, xestionaremos e supervisaremos dende un ordenador todos os sistemas do edificio, como o sistema eléctrico, o sistema de climatización, a produción de enerxía renovable, os contadores de gas e electricidade, o control de accesos, a videovixilancia ou protección contra incendios, entre outros.
3.- Sistema de xestión e control de accesos: O acceso ás instalacións deportivas realizarase mediante tornos, o cal cremos que é a mellor opción para o control de accesos, porque permitirá o acceso autónomo ós usuarios mediante lectores ópticos ó recinto, evitando que accedan persoas alleas á instalación e mantendo un control sempre de usuarios dentro do recinto.