Monforte de Lemos, 24 de abril de 2019. A primeira das representacións do XXVIII Certame Municipal de Teatro para Centros de Ensino de Monforte de Lemos terá lugar mañá xoves 25 de abril a partir das 20:00 h no salón de actos da Casa da Cultura.
Nesta ocasión alumnos e alumnas da aula de teatro do CEIP Monforte, representarán a obra "A unión fai a terra", peza dirixida, coordinada e adaptada por Paqui Abeledo, a partir do texto do mesmo título de Macu Sanz.
En “A unión fai a terra" asteroides, planetas, estrelas, satélites e demais pululantes do “Universo Diverso” están moi preocupados cos síntomas da terrible enfermidade do planeta Terra: contaminación do aire e das augas, cambio climático, destrución masiva dos bosques, etc.
A destrución da Terra parece inevitable. Coa fin desta, todos se reúnen para recordala e reflexionar sobre as relacións e o comportamento que mantiñan con ela.
Vindeiras obras do Certame
A segunda das representacións do XXVIII Certame Municipal de Teatro terá lugar o venres 26 de abril a partir das 20:00 h no salón de actos da Casa da Cultura. Os alumnos e alumnas do grupo de teatro "A Pinguela 2019", baixo a dirección de Paqui Abeledo, representarán a obra "Lingua de lata", adaptación de Francisco Oti e Julio Fernández.
En “Lingua de lata" o avión de Antonine de Saint-Exupèry que na actualidade esmorece perdido nun vertedoiro de lixo e chatarras dalgún lugar do mundo onde da con el un personaxe que sen sabelo está destinado a ser un novo principiño.
Latexa na representación a amizade como valor a aprender e a imaxinación como ben imprescindible para comprender e entender, ademais de poñer en cuestión as relacións dos seres humanos co noso propio entorno.
Finalmente, a terceira das representacións será o luns 29 de abril ás 20:00 h na Casa da Cultura, 12 alumnos e alumnas do Colexio Ferroviario porán en escena a obra “Bar Manolo”, baixo a dirección de Sabela González Chas e Juan José Diéguez López.
A Primitiva, ese gran soño.
E se efectivamente o primeiro día da túa vida fose o primeiro día da outra vida?.
